"Тинчлик ва осойишталик – олий неъмат!" рукни остида
Азизлар, тинчликнинг қадрига етайлик. Мисол учун айтамиз. Фитналарнинг дастлабки ўчоғи бўлган Ироқ давлатининг пойтахти Бағдод шаҳрини ҳаммамиз биламиз. Бу шаҳар бир вақтлар одамлар талпинган эртакнамо гўша эди. Бағрида не не олимлар абадий қўним топган, том маънода тараққий топган гўзал шаҳар эди. Ёки қадимги, афсонавий Шом диёрининг, бугунги Суриянинг пойтахти Дамашқни олайлик. Дунёда кўзга кўринган воизлар, уламолар, қорилар юрти эди. Ижтимоий инфратузилмаси жуда ҳам гўзал, файзли бўлган обод жойлар эди. Бугун эса бу жойлар вайронага айланди. Олдин у жойларни кўриш орзусида юрганлар ҳозирда бориш тугул, уша жойдан учиб ўтишдан ҳам қўрқмоқдалар. Буларнинг бари фитна сабабидандир. Шунинг учун тинчлик-осойишталик ҳукмрон бўлиб турган бу заминда истиқомат қилиш бахтига муяссар этгани учун Аллоҳга ҳамд айтишдан забонимиз тўхтамасин. Шукроналик билан жисмимиз йўғрилсин. Шундагина бу неъматни зиёда бўлишига ҳисса қўшган бўламиз. Зеро, ҳикматларда: "Тинчлик бу - қалб, ақл ва бутун бошли жамиятларнинг роҳатидир", дея бежиз айтилмаган.
Расулуллоҳ соллаллоҳу алайҳи васаллам шундай марҳамат қилдилар: "Икки неъмат борки, ундан кўп инсонлар маҳрумдирлар. Булар: сиҳат-саломатлик ва хотиржамликдир".
Ота-боболаримизнинг бизгача етиб келган урф бўлиб кетган дуолари бор. Меҳмондорчилик ёки бирон манзилга тушганда қўллар дуога очилиб, тинчлик, саломатлик ва хотиржамликни сўраб, Аллоҳдан сўралади. Ўзимиз ҳам беихтиёр бирон жойга борганимизда ушбу дуони қиламиз. Яъни, тилимизга ўрнашиб қолган. Бизлардан кейин набира, абираларимизда такрорланса ажаб эмас. Нима учун бу қадар ушбу икки жумла бот-бот тилга олинади? Чунки бу неъматларни бир пайтлар йўқотган ота-боболаримиз яна ушбулардан маҳрум бўлиб қолишдан хавотир қилиб, илтижо қиладилар. Ҳикматларда, неъматнинг қадри ўтиб кетганидан кейин билинади, дейилган. Айнан тинчлик, саломатлик ва хотиржамлик аталмиш неъматларни боболаримиз бир пайтлар йўқотиб қўйишгани учун ҳам мана шундай дуолар қиладилар. Бунга тарих гувоҳ. Бу ҳақида ортиқча изоҳга ҳожат йўқ, барчамиз биламиз. Аллоҳга ҳамд бўлсин, биз, ҳозирги авлод бу нарсани кўрмади, кўрмасин ҳам. Аллоҳдан сўрайлик, бугунги офиятли дамларни Ўзи бардавом қилсин!
Қодиржон Умурзаков,
Поп тумани “Муҳаммаджон қори” жоме
масжиди имом хатиби
