Халқимиз – тинчликсевар халқ. Бошқа масалаларда турлича фикрлаши, баҳслашиши мумкин, лекин бу борада ҳамма бирдам, ҳамжиҳат. Кексаю ёш аввало тинчлик бўлсин, дейди. Президентимизнинг энг катта орзу-интилиши, ташвиши ва амалий ҳаракатлари ҳам – халқимизнинг тинчлиги ва фаровонлигини таъминлашга қаратилган.
Инсон дунёга келибдики, бахтга, яхшиликларга интилиб яшайди. Саодатли бўлиб ҳаёт кечиришни орзу қилади. Унга етишиш йўлларини излайди. Албатта бу неъматга ўз-ўзидан эришилмайди. Халқимиз азалдан бахт деганда тинчлик, хотиржамлик, сиҳат-саломатлик, фарзандлар камоли, эл-юрт олдида юзи ёруғлик кабиларни асосий мезон сифатида билган.
Ҳар бир одамнинг бахти, энг аввало Яратганнинг инояти, ўзининг меҳнати ваинтилишлари билан боғлиқ. Лекин шуни унутмаслик зарурки, инсон халқдан, жамиятдан, Ватандан айро ҳолда бахтли бўла олмайди. Тинчлик осойишталик қўлга киритаётган ютуқларимизнинг бош мезони, эришаётган марраларимиз фарзандларимиз бахти ва камолининг асосидир.
Тинчлик шукуҳи ҳукумрон бўлмаса, инсонга бу дунёда ҳеч бир нарсанинг, жамиятдаги ҳузур-ҳаловатнинг қадри колмайди. Хотиржамлик йўқ жойда тараққиёт ҳам, ризқ-руз ҳам бўлмайди. Келажак эртанги кун ҳақида орзу-умид ҳам, бахт ҳам, осудалик ҳам ҳаёлга айланади. Шу боис тинчлик тараққиётнинг бош омили, эришаётган барча мавафақиятларимизнинг калитидир.
Хўш тинчлик шундай тотли неъмат экан, унга қандай эришилади ёки тинчлик қандай муҳофаза этилади. Осойишталик инсонларнинг бир-бирига ҳадя этадиган туҳфаси бўлса экан, осонгина қўлга киритилса. Тинчлик неъмати учун нафақат Яратганга дуо ва илтижоларни кўпайтириш, балки курашиш ҳам кераклигини ҳаётнинг ўзи кўрсатиб бермоқда.
Бугун дунёга назар ташлайлик. Арим узоқ яқин мамлакатларда бўлаётган нотинчликлар, ўзаро низолар ўша мамлакатнинг аҳолисига нима берди, кимнинг ечилмаган муаммосини ечди, кимни муродига етказди? Аксинча минглаб одамларнинг умрига зомин бўлди. Яна кимдир бошпана излаб ўзга юртларда сарсон саргардон.
Демак, инсон Яратганнинг розилигига ҳам, ўзининг бахту-иқболига ҳам шукрона ва огоҳлик орқали эришар экан. Ҳамма ҳолатда ҳам, ҳар бир инсон шукрона қилиб юриши лозим.
Уйчи туман бош имом хатиби
Олимхон Исаков
