Бугун жаннатмакон Ўзбекистонимиз мустаққиллигининг 34 йиллиги байрамини дилда қувонч ва катта шодиёналар билан кутиб олиш тараддудида турибмиз. Аллоҳ таоло бу саодатли ва қутлуғ айёмни барчамизга муборак айласин.

Инсон ўзидаги неьмат ҳақида мулоҳаза юритиш, шу неъматда ўзгалар ҳам баҳраманд ёки бебаҳра эканлигини уйлаб кўриш билан унинг қадрини билади. Бу эса янада кўпрок Аллоҳга шукр қилишга ундайди. Албатта, бу Аллоҳ таолога ҳуш келади. Натижада неъматнинг янада зиёда бўлишига сабаб бўлади.

Расулуллоҳ соллаллоҳу алайҳи васаллам ҳадисларининг бирида: “Кайси бирингиз тонгда уйқудин уйғонганда оиласи тинч, тани соғ ва уйида бир кунлик егулиги бўлса, билсинки унда дунёдаги барча неъматлар мужассам экан” деганлар (Имом Термизий ривояти).

Барчамиз ўз навбатида ислом динининг мусаффолигини сақлаш, унинг асл моҳиятини теран англаб, ёш авлодни турлиғаразли кучлар таъсиридан ҳимоя қилишга масъул эканлигимизни ҳис этишимиз зарур бўлади

 Бир замонлар умра ва ибодатини ва чет элга бир ҳафтагина «туристик саёҳат»га чиқиш ойга учишдек орзу ҳисобланган бўлса, бугун Ўзбекистон фуқароси дунёнинг истаган мамлакатига бориб ибодатини қилияпди ва ўқияпти, ишлаяпти. Тарихимиз, тилимиз, маънавий қадриятларимиз тикланди…

Энг муҳими, онги мустақиллик йилларида шаклланган, тафаккури, дунёқараши янгича авлод пайдо бўлди. Мана шу авлодга  Ватан мустақиллиги «ўзидан-ўзи», «осмондан» тушмаганини уқтириб бориш, уларни истиқлолни авайлашга, юрт озодлиги йўлида жонини фидо қилган аждодларини унутмасликка ундаб туриш  — катта ёшдагиларнинг бурчларидир. Зеро, бугуннинг қадрига етиш учун кечаги кунни эсдан чиқармаслик керак. жаҳоннинг истаган мамлакатига борган ҳамюртимиз «Мен Ўзбекистон фуқаросиман», деб фахр билан айтиши мумкин. Чунки бошқа мамлакатлар қатори Ўзбекистоннинг ҳам дунё ҳамжамиятида ўз ўрни, обрў-эътибори бор. Юртбошимиз таъкидлаганидек, биз ҳеч кимдан кам эмасмиз!

 Дунёда меҳри дарё аёллар кўп. Аммо инсон боласи учун Она битта бўлади. Дунёда гўзал юртлар ҳам кўп. Аммо инсон боласи учун Ватан битта бўлади! Сиз билан биз она юртимизни қанча эъзозласак, шу кунларга етказгани учун Яратганга қанча шукрона қилсак, истиқлолимизни қанча авайласак, ҳозирги таҳликали замонда юртимиздаги тинчлик-тотувликни асрасак, ёш авлод ҳам ўрнак олади.

Азиз ва муборак истиқлолимизнинг 34 йиллик шодиёналарини шоду-хуррамлик, масрурлик, тинчлик-омонлик ва ўзаро иттифоклик билан ўтказишимизни Яратган насиб айласин! Мустақиллигимиз байрами барчамизга  муборак бўлсин!

Олимхон Исақов,
Уйчи туман бош имом хатиби