Алҳамдулиллаҳ, биз мустақиллигимизнинг ўттиз уч йиллигини нишонлаш арафасидамиз. Бу улуғ неъмат Аллоҳнинг бизга берган буюк марҳаматидир. Мустақиллик йилларида Ватанимизда нафақат иқтисодий ва ижтимоий, балки диний-маънавий соҳаларда ҳам катта ўзгаришлар рўй берди. Исломий қадриятлар ва анъаналар жамиятимиз ҳаётининг ажралмас қисмига айланди.

Ислом динининг асосий ғоялари тинчлик, адолат ва инсонпарварликдир. Мустақиллик эса бизга бу тамойилларни тўлиқ амалга ошириш имкониятини берди. Биз ўз эътиқодимизни эркин адо этиш, диний маросимларни бемалол бажариш ва ўзимизни исломий билимлар билан бойитиш имкониятига эга бўлдик. Масжидлар қайта очилди, янги диний таълим муассасалари ташкил этилди, бу эса халқимиз орасида диний билим ва маънавиятнинг юксалишига хизмат қилди.

Ўттиз уч йил давомида мамлакатимизда динимизни ривожлантириш, мусулмон жамиятининг маънавий қадриятларини сақлаш ва мустаҳкамлаш бўйича кўплаб муҳим ишлар амалга оширилди. Мустақиллик бизга динимизнинг поклигини сақлаш, миллий ва диний меросимизни асраб-авайлаш, келажак авлодларга етказиш имкониятини берди.

Биз ўтиз уч йиллик тўйини нишонлаш арафасида турган буюк ва бебаҳо неъмат – мустақилликнинг миллий тараққиётимиз, бугунги ва келгуси авлодлар тақдири, келажаги учун беқиёс аҳамияти йиллар ўтиши билан тобора ортиб бормоқда. Янги Ўзбекистоннинг давлат мустақиллиги халқимизнинг миллий манфаатларини, тинч ва осуда ҳаётини таъминлаш, мамлакатимизнинг халқаро миқёсдаги обрў-эътиборини юксалтиришнинг мустаҳкам пойдевори бўлиб келмоқда.

Ислом дини мусулмонлардан ўз Ватанини севишни, уни ҳимоя қилишни ва ривожлантиришни талаб қилади. Қуръони каримда Аллоҳ таоло “Сизларга не бўлдики, Аллоҳ йўлида ва “Эй, Раббимиз, аҳолиси золим бўлган ушбу шаҳардан бизни чиқаргин, бизга Ўз ҳузурингдан бир дўст бергин ва бизга Ўз ҳузурингдан бир ёрдамчи ато этгин!” – деяётган бечора эркак, аёл ва болалар (озодлиги) учун жанг қилмайсизлар?!” (Нисо сураси, 75-оят) деган. Бу оят мусулмонларга ўз Ватани ва халқини ҳимоя қилиш зарурлигини эслатади.

Мустақиллик йилларида биз Ватанимизни севиш ва ҳимоя қилишнинг нақадар муҳим эканлигини чуқур англадик. Ўтмишда аждодларимиз мустақиллик учун қандай кураш олиб борган бўлса, бугун биз бу неъматни сақлаб қолиш ва ривожлантириш учун жавобгармиз. Мустақиллик – бу нафақат эркинлик, балки катта масъулиятдир. Бизнинг ҳаракатларимиз, диний ва миллий қадриятларимизни асраб-авайлаш, Ватанимизнинг равнақига ҳисса қўшиш – мустақилликнинг ҳақиқий мазмунидир.

Бугунги кунда дунё бўйлаб кўплаб мусулмон давлатлари тинчлик ва барқарорликка интилиб, турли синовларга дуч келмоқда. Бизнинг юртимизда эса Аллоҳнинг изни билан тинчлик, хотиржамлик ва тараққиёт ҳукм сурмоқда. Бу бизнинг бирлигимиз, сабримиз ва Ватанимизга бўлган муҳаббатимизнинг натижасидир. Бунга шукроналик сифатида, биз динимизни янада чуқур ўрганиш ва унга мувофиқ ҳаёт кечиришимиз лозим.

Бу йиллар давомида амалга оширилган ишларимиз юртимизни юксак марраларга олиб чиқмоқда. Аммо бу жараён доимий ҳаракатни талаб қилади. Биз Ватанимизни янада ривожлантириш учун биргаликда меҳнат қилишимиз керак. Мустақилликнинг ўттиз уч йиллиги – бу нафақат ўтмишдаги ютуқларни нишонлаш, балки келажак учун режа тузиш ва мақсадлар қўйиш вақтидир.

Бугун мустақил юртимизда халқимиз тантанавор шиорларни айта олиш неъматига сазовор бўлмоқда. Сўзимизнинг далили сифатида юртимизнинг барча гўшаларида “Бир бўлсак – ягона халқмиз, бирлашсак – Ватанмиз!” деган бош ғоя тантанаси жарангламоқда. Жойлардаги сайлларда, тадбирларда, давра суҳбатларида бу ғоя фахрланиб, кўтаринки овоз билан зикр қилинмоқда, қалбларга руҳ бахш этмоқда.  Чунки, Ватандан азизроқ макон йўқ бу дунёда. Ер юзида Янги Ўзбекистонимиз – яккаю ягона, биз у билан ҳар қанча фахр-ифтихор қилсак кам. Бунга унинг бой ўтмиши ҳам, равнақ топаётган бугуни ҳам, порлоқ келажаги ҳам тўла асос бўлади.

Фурсатдан фойдаланиб, юртдошларимизни Ватанимиз тинчлигини, хотиржамлигини асрашга, мустақиллигимизни қадрлашга чорлаймиз. Мустақиллигимизнинг ўттиз уч йиллик тўйи билан бутун ватандошларимизни муборакбод этамиз. 

Аллоҳдан тилаймизки, юртимизни тинчлик-хотиржамликда сақласин, мустақиллигимизни абадий қилсин, ҳар биримизга Унинг йўлидан юришда бардавомлик ато қилсин! 

Мусохон домла АББОСИДДИНОВ,

Ўзбекистон мусулмонлари идорасининг

Наманган вилоят вакили, 

вилоят бош имом-хатиби