Муқаддас рисолани асраш йўллари

Оила – жамиятнинг асосий устуни. Мустаҳкам оилалар барқарор жамиятнинг шаклланишига замин яратади. Аммо кейинги йилларда оилавий ажримлар муаммоси долзарб масалалардан бирига айланди. Оилавий муносабатларнинг бузилиши нафақат икки тараф, балки фарзандлар ва кенг жамиятга ҳам салбий таъсир кўрсатади. Ажримларнинг олдини олиш учун қатор чора-тадбирларни амалга ошириш зарур. 

Оилавий ажримлар сабаблари

Ажримларга олиб келувчи асосий сабаблардан айримлари:

1.Молиявий қийинчиликлар.

2.Оилавий муносабатлардаги тушунмовчиликлар.

3.Ёшларнинг никоҳга тайёр эмаслиги.

4.Ёмон одатлар (алкоголь, қимор ва ҳ.к.).

5.Оилавий масъулиятнинг англанмаслиги.

Ажримларнинг олдини олишда амалий йўллар

Таълим ва тарбиянинг аҳамияти

Никоҳга киришишдан олдин ёшларга оилавий ҳаётнинг масъулиятлари ҳақида ўргатиш керак. Никоҳ ёшига етган ўғил ва қизларга оилавий муносабатлар ва этика бўйича дарслар ташкил этиш самарали бўлади.

Мулоқот ва тушуниш маданияти

Оилавий муаммоларнинг катта қисми мулоқот йўқлиги ёки нотўғри мулоқот сабабли келиб чиқади. Эри-хотин ўзаро ҳурмат ва эшитиш маданиятини ривожлантириши лозим.

Ижтимоий қўллаб-қувватлаш

Сир эмаски бугунги кунда кўплаб оилаларда асосий низолар йўқчиликдан келиб чиқмоқда. Бунинг олдини олиш бўйича ҳар бир шахс ўзининг ижтимоий ҳолатидан келиб чиқган ҳолда юқоридаги каби оилаларга ёрдам кўрсатиши керак. Бугунги кунга келиб айрим инсонлар ким ўзарга ёки дабдаба учун турли хил исрофгарчиликларга йўл қўймоқдалар. 

Ушбу исрофгарчиликларни ўрнига ночор, моддий ёрдамга муҳтож оилаларга ёрдам қилганлари афзалроқдир. 

Бу борада яқинда Ўзбекистон мусулмонлари идораси раиси Шайх Нуриддин Холиқназар ҳазратларининг Уламолар кенгашида қабул қилинган ва бутун халқга МУРОЖААТЛАРИ айни муддао бўлди. Ушбу мурожаатдан ҳар бир фуқаро ўзи учун хулоса чиқариб аҳолининг ёрдамга муҳтож қатламига имкон даражасида ёрдам кўрсатишлари лозимдир. 

Оилавий ажримларнинг олдини олиш учун фақат давлат эмас, балки жамиятнинг ҳар бир аъзоси масъулдир. Оилавий муносабатларда сабр, ўзаро ҳурмат ва мулоқот маданиятини шакллантириш орқали мустаҳкам ва барқарор оилалар яратиш мумкин. Бу нафақат жамиятимиз равнақи, балки келажак авлодлар бахти учун ҳам муҳимдир.

Нурулло Маҳкамов,

Чуст туман “Саид Насимхон тўра” 

жоме масжиди имом-ноиби