Фарзанд – Аллоҳ таолонинг инсонга берган энг буюк неъматларидан бири, оила саодати ва ҳаёт мазмунидир. Шу боис халқимиз азалдан фарзандни қалб райҳонига қиёслаб келган. Райҳон ўзининг хушбўй ифори билан инсон қалбига ором бахш этгани каби, фарзанд ҳам оилага қувонч, меҳр ва бахт олиб киради. Фарзанд бор хонадонда ҳаёт давом этади, орзу-умидлар яшнайди ва келажакка ишонч мустаҳкамланади.
Миллатнинг эртанги куни, давлатнинг тараққиёти ва халқнинг фаровонлиги, аввало, бугун тарбияланаётган фарзандларга боғлиқ. Шунинг учун ҳам фарзанд тарбияси ҳар бир ота-она учун нафақат масъулият, балки муқаддас бурч ҳисобланади. Зеро, яхши тарбия кўрган фарзанд ота-онасининг юзини ёруғ қилади, эл-юртга наф келтиради ва жамиятда муносиб ўрин эгаллайди.
Буюк мутафаккирлар фарзанд тарбиясига алоҳида эътибор қаратганлар. Жумладан, Абу Али ибн Сино инсон камолотида илм билан бир қаторда одоб ва ахлоқ муҳим аҳамият касб этишини таъкидлаган. Чунки билим инсонни улуғласа, одоб унинг қадрини янада юксалтиради.
Бугунги кунда мамлакатимиз аҳолисининг қарийб 64 фоизини ёшлар ташкил этади. Бу эса Ўзбекистоннинг улкан интеллектуал ва демографик салоҳиятга эга эканлигини кўрсатади. Давлатимиз томонидан ёшларни қўллаб-қувватлаш, уларнинг сифатли таълим олиши, замонавий касб-ҳунарларни эгаллаши ва иқтидорини намоён қилиши учун кенг имкониятлар яратилмоқда. Бу имкониятлардан самарали фойдаланиш эса ёшларнинг ўз интилиши ва ҳаракатига боғлиқ.
Илм-маърифат ҳар қандай тараққиётнинг асосидир. Илмли фарзанд нафақат ўзининг, балки оиласи ва жамиятининг ҳам келажагини барпо этади. Шунинг учун фарзандларда китобхонлик маданиятини шакллантириш, мустақил фикрлаш кўникмасини ривожлантириш ва уларни изланишга ундаш муҳим аҳамият касб этади. Чунки илм билан қуролланган ёшлар ҳар қандай синов ва рақобатга муносиб жавоб бера олади.
Шу билан бирга, таълим тарбия билан уйғун бўлгандагина ҳақиқий самара беради. Одобли, меҳрибон, ватанпарвар ва ҳалол инсон бўлиб камол топган фарзанд миллатнинг ҳақиқий бойлиги ҳисобланади. Ота-онага ҳурмат, устозга эҳтиром, Ватанга муҳаббат каби юксак фазилатлар ҳар бир ёшнинг қалбида мустаҳкам қарор топиши лозим.
Фарзанд қалб райҳонидир. Уни асраб-авайлаш, меҳр билан тарбиялаш, илм ва маърифат бериш орқали биз нафақат бир инсоннинг, балки бутун жамиятнинг келажагини барпо этамиз. Чунки бугунги фарзандлар эртанги куннинг олимлари, шифокорлари, муҳандислари, тадбиркорлари ва давлат арбобларидир. Баркамол авлодни тарбиялаш эса Янги Ўзбекистон тараққиётининг энг мустаҳкам пойдеворидир.
Абдулбосит Мамадалиев,
Янги Наманган тумани “Абдуллоҳ ибн Масъуд”
жоме масжиди имом ноиби
