Жаннатдаги “Райён” эшиги муборак бўлсин!
"Жаннатда бир эшик бор, уни "Райён" деб аталади. Қиёмат куни ундан рўзадорларгина киришади".
Рўзанинг шафоати муборак бўлсин!
"Рўза ва Қуръон Қиёмат куни.ўз соҳибинии шафоат қилади".
Аллоҳ таолога рўбарў бўлгандаги хурсандчилик муборак бўлсин!
"... Роббисига йўлиққанда, рўзаси ила хурсанд бўлади".
Дўзахдан омонлик муборак бўлсин!
"Рамазоннинг ҳар кечасида дўзахдан озод қилинадиганлар бўлади".
Ўтган гуноҳларингиз кечирилгани муборак бўлсин!
"Ким иймон билан, савоб умидида Рамазон рўзасини тутса, унинг ўтган гуноҳлари мағфират қилинади".
Қабул бўлган дуолар муборак бўлсин!
"Рўзадорнинг дуоси рад этилмайди".
Аллоҳнинг мукофоти муборак бўлсин!
"...фақат рўза Мен учундир ва унинг мукофотини Мен Ўзим бераман".
Гуноҳлар кечириладиган кун
Расулуллоҳ соллаллоҳу алайҳи васаллам: "Рамазоннинг охирги кечасида уларнинг барчасини Аллоҳ мағфират қилиб юборади", дедилар. Шунда саҳобалар: "Ё Расулуллоҳ! Ўша қадр кечаси бўладими?" деб сўрашди. Расулуллоҳ соллаллоҳу алайҳи васаллам: "Йўқ, аммо ишчининг иш ҳаққи ишни мукаммал адо қилиб бўлганидан кейин берилади", дедилар (Имом Аҳмад ривояти).
Ибн Жавзий раҳимаҳуллоҳ айтади: «Аллоҳга қасамки, агар қабр аҳлига: «Тиланг (тилагингиз бажо келтирилади)», деб айтилганда, албатта улар Рамазоннинг бир кунига бўлса ҳам етишни исташган бўларди».
Бизнинг қўлимизда бу имконият нақд турган эди , фойдалана олдикми?!
Ҳазрати Бурайда розияллоҳу анҳу айтадилар:
Бир куни Набий соллаллоҳу алайҳи васаллам Билол розияллоҳу анҳуга:
"Эй, Билол! Кел, биз билан таомлан" дедилар. У:
"Мен рўзадорман" деди.
Шунда, Набий соллаллоҳу алайҳи васаллам:
"Биз ўз ризқимизни еяпмиз. Билолнинг ризқи эса жаннатга сақлаб қўйиляпти. Эй, Билол! Биласанми, модомики, рўзадор ҳузурида таом ейилар экан, унинг суяклари тасбеҳ айтиб туради ва фаришталар унинг ҳаққига истиғфор айтиб турадилар" дедилар.
Ё Раббий!
Сенинг ризолигинг учун бир ой рўза тутдик! Қолган умримизни ҳам Сенинг ризолигинг учун ўтказишни насиб айлагин!
• Ушбу Рамазонда бирга ибодат қилган биродарларимиз билан Жаннатларингда жам қилгин!
• Рўзаларимиз даргоҳингда қабул бўлгани исботи учун иймонимизни, амалимизни янада зиёда қилгин!
• Қиёмат куни ҳар бир аъзоларимиз гувоҳлик берадиган пайтда бизнинг фойдамизга ишлашини марҳамат айлагин!
• Биз осий бандларингмиз. Тутган рўзларимиз ҳурмати онадан қайта туғилгандек пок қилгин!
Рамазон ҳайити муборак бўлсин!
Нуриддин Хамракулов,
Учқўрғон тумани “Саттибой халфа” жоме
масжиди имом ноиби
