Ислом динида Рамазон ойи раҳмат, мағфират ва дўзахдан нажот топадиган ой сифатида улуғланади. Бу муборак ойда мўмин-мусулмонлар нафсини тийиш, сабр-тоқат, бағрикенглик ва саховат каби фазилатларни янада мустаҳкамлайдилар. Рамазон фақат рўза тутиш ойи бўлибгина қолмай, балки меҳр-мурувват ва хайр-эҳсон ойидир. Рамазон ойида инсон очлик ва чанқоқликни ҳис қилиб, муҳтожларнинг ҳолатини яхшироқ англайди. Бу эса қалбда раҳм-шафқат туйғуларини уйғотади. Камбағаллар, етим-есирлар, ногиронлар ва муҳтожларга ёрдам бериш – бу ойнинг энг улуғ амалларидан ҳисобланади.

Аллоҳ таоло Қурони Каримда яхшилик ва эҳсон қилишни кўп бора таъкидлаган. Айниқса, Рамазон ойида қилинган савобли амалларнинг ажри бир неча баробар қилиб берилиши ваъда қилинган. Рамазонда закот, фитр садақаси ва ихтиёрий садақалар бериш катта савобга сабаб бўлади. Муҳтожларни қўллаб-қувватлаш жамиятда ўзаро меҳр-оқибатни мустаҳкамлайди. Пайғамбаримиз Muhammad (соллаллоҳу алайҳи васаллам) Рамазон ойида бошқа вақтларга нисбатан янада саховатли бўлганлар. Бу эса бизга ҳам сахийлик ва бағрикенглик намунасидир.

Бугунги кунда мухтарам Президентимизнинг фармонлари билан бир қатор соҳа вакиллари ва кам таминланган ва мехрга мухтож оилаларга моддий ёрдам кўрсатилишихам айнан манашуни ёрқин ифодасидир. 

Рамазон –ойининг яна бир мухим жихатларидан нафс ва рух тарбияси ойихамдир.

Бу ойда фақат очлик билан чекланиб қолмасдан, тилни ёмон сўздан, қалбни кина ва ҳасаддан, қўлни ёмон ишлардан сақлаш лозим. Рамазон инсонни маънавий покланишга, тақвога ва яхшиликка чорлайди. Меҳр-мурувватли жамиятни шакллантириш ҳам айнан шу фазилатлар орқали амалга ошади.

Рамазон – бу нафақат рўза тутиш, балки қалбни поклаш, муҳтожларга ёрдам бериш, меҳр-оқибатни кенг ёйиш ойидир. Ҳар бир мўмин ушбу муборак ойни фурсат деб билиб, хайр-эҳсон ишларини кўпайтириши, яқинларига ва жамиятга манфаат келтириши лозим. Шундагина Рамазон ойининг ҳақиқий маъносини англаган бўламиз. 

Рамазон – раҳмат ва мағфират ойи

Рамазон ойи – ислом уммати учун энг фазилатли ва муборак ойдир. Бу ой Қуръони карим нозил бўла бошлаган, раҳмат эшиклари кенг очиладиган, гуноҳлар мағфират қилинадиган ва бандалар учун улкан савоблар берилган ойдир. Қурьонда шундай марҳамат қилинади: “Рамазон ойи – одамлар учун ҳидоят, тўғри йўл ва ҳақни ботилдан ажратувчи далиллар нозил қилинган ойдир” (Бақара, 185-оят).

Рамазон – раҳмат ойи

Раҳмат – Аллоҳ таолонинг бандаларига бўлган меҳр-шафқати ва иноятидир. Рамазон ойида қилинган ҳар бир яхши амалнинг савоби бир неча баробар қилиб ёзилади. Рўза тутиш, таровеҳ намози ўқиш, садақа қилиш, Қуръон тиловат қилиш каби ибодатлар инсон қалбини поклайди ва уни Аллоҳга яқинлаштиради.

Пайғамбаримиз Мухаммад соллаллоҳу алайҳи васаллам шундай деганлар: “Қачонки Рамазон ойи кирса, жаннат эшиклари очилади, дўзах эшиклари ёпилади ва шайтонлар занжирланади” (Имом Бухорий ривояти). Бу ҳадис Рамазоннинг қанчалик улуғ ва раҳматга тўла ой эканини кўрсатади.

Рамазон – мағфират ойи

Мағфират – гуноҳларни кечириш демакдир. Рамазон ойида ихлос билан рўза тутиб, ибодат қилган мўминнинг аввалги гуноҳлари кечирилиши ваъда қилинган. Бу ойда тавба-истиғфор қилиш, ўз нафсини ислоҳ этиш, хатолардан қайтиш жуда муҳимдир.

Рамазоннинг охирги ўн куни айниқса фазилатли бўлиб, унда Қадр кечаси мавжуд. Қадр кечаси минг ойдан афзал экани Qur'onда баён қилинган (Қадр сураси). Бу кечада қилинган ибодатлар инсоннинг тақдирида яхшиликларга сабаб бўлади.

Рамазон – тарбия мактаби

Рамазон нафақат рўза тутиш ойи, балки сабр, тақво ва ахлоқни тарбиялайдиган мактабдир. Очлик ва чанқоқликни ҳис қилиш орқали инсон муҳтожларга раҳм-шафқатли бўлишни ўрганади. Тилни ёмон сўздан, кўзни ҳаромдан, қалбни кибр ва ҳасаддан сақлашга ҳаракат қилади.

Рамазон – раҳмат, мағфират ва нажот ойидир. Бу ойни ғанимат билиб, кўпроқ ибодат қилиш, Қуръон ўқиш, садақа бериш ва яхши амалларга шошилиш ҳар бир мусулмон учун муҳимдир. Аллоҳ таоло барчамизни Рамазоннинг раҳмати ва мағфиратига сазовор этсин, қилган ибодатларимизни қабул айласин.

Фазлиддин Камолов, 

Учқўрғон туман “Абдулхамид хожи Абдуррахмон ўғли” 

жоме масжиди имом хатиби