Ҳар бир ёшнинг ҳаётида никоҳ — энг улуғ ва масъулиятли қадамдир. Бу икки қалбнинг бирлашиши, янги оила пойдеворининг қўйилиши демакдир. Аммо афсуски, сўнгги йилларда баъзи жойларда никоҳ тўйлари ортиқча дабдаба, исроф ва кўз-кўз қилиш билан ўтиши кузатилмоқда. Бу ҳолат на диний, на ахлоқий жиҳатдан маъқул эмас. Шу боис, исрофсиз никоҳ тўйи ғояси бугун жамиятимизда тобора долзарб аҳамият касб этмоқда.

Исломда исрофнинг маъноси

Қуръони каримда Аллоҳ таоло шундай марҳамат қилади: “Албатта, исроф қилувчилар шайтонларнинг биродарларидир.” (Исро сураси, 27-оят)

Бу оятдан маълумки, ортиқча сарф-харажат, кераксиз дабдаба ва фахрланиш нияти билан ўтказилган тўйлар инсонни баракадан маҳрум этади. Расулуллоҳ соллаллоҳу алайҳи ва саллам ҳам оддийликни маъқул кўрганлар ва:

“Никоҳнинг энг баракалиси — энг осон бўлганидир,” — деганлар.

Исрофсиз тўйнинг маънавий аҳамияти

Исрофсиз никоҳ тўйи — бу, аввало, оддийлик ва самимият рамзидир. Бундай тўйда инсонлар нафсга эмас, маънавиятга хизмат қилади. Ёшлар қарзсиз, ортиқча сарфсиз ҳаётни бошлайди, ота-оналар эса оғир моддий юкдан қутулишади. Энг муҳими — бу тўй Аллоҳнинг розилиги ва дуоси билан ўтади.

Амалда исрофсиз тўйни қандай ўтказиш мумкин?

Ниятни тўғри қилиш. Тўйнинг мақсади — ҳалол никоҳ ва баракали ҳаёт қуриш эканлигини унутмаслик.

Оддий маросим. Тўйни хонадонда ёки кичикро қ залда ўтказиш мумкин.

Меҳмондорчиликда меъёр. Яқин қариндош ва дўстлар иштирокида, озуқа ва таомни исроф қилмасдан дастурхон тайёрлаш.

Қимматбоҳ кийим ва безаклардан қочиш. Оддий, покиза ва муносиб либос етарли.

Маънавий муҳит яратиш. Тўйда Қуръон тиловати, дуо, мадҳия ёки ибратли нутқлар бўлиши мумкин.

Бундай тўйнинг фойдалари

Ёшлар ҳаётни қарзсиз бошлайди.

Ота-оналар ортиқча моддий юкдан қутулишади.

Жамиятда самимият, оддийлик ва исломий қадриятлар мустаҳкамланади.

Энг муҳими — Аллоҳнинг баракаси ва муҳаббати билан оила қурилади.

Хулоса ўрнида айтиб ўтамизки,  Исрофсиз никоҳ тўйи — бу фақат тежамкорлик эмас, балки барака, шукроналик ва маънавият рамзидир. Бундай тўйлар жамиятимизда эзгуликни, муҳаббатни ва аҳилликни кучайтиради. Ҳар бир ёш никоҳини исрофсиз, самимий ва баракали йўсинда бошласа, оилавий ҳаёти ҳам шундай тинч ва фаровон кечади.

Маъруфхон Алоходжаев, 
Наманган шаҳар “Абдулқодир қори” жоме  
масжиди имом-хатиби